遺忘的唱盤時光@王菲

自從識聽歌以來，在基爾心目中可以封為「型級」的本地女歌手只有5位。至於到底係邊5個，其實有blog友已經估中了，分別係葉德嫻、梅艷芳、林憶蓮、關淑怡，以及今次會講到的王菲！

90年代的王菲（王靖雯）出過唔少令人印象深刻兼百聽不厭的唱片，不過若要數由封面設計到裏面的歌一樣型到無鄰的，基爾心水之選一定係《十萬個為什麼》和喱張《菲靡靡之音》，時至今日依然唔會覺得out！

發行於1995年的《菲靡靡之音》，眨下眼原來已經有成18年歷史咁耐，當年出世的BB依家已經拎成人身份證兼去考中學文憑試了，時光飛逝有時真的好可怕……講返張碟，裏面13首歌全部都是翻唱當年逝世的鄧麗君的歌，不過由於大部份都不算屬於鄧的大紅hit歌，加上全部用了全新編曲，功不可沒的當然還有王菲別樹一幟的唱腔風格，成件事出到來即時充滿了超型的新鮮感覺，完全可以當新歌來聽。



其實碟中13首鄧麗君比較「冷門」的歌，大多都有成30幾年歷史。後來流行了You Tube，基爾才有機會聽返鄧麗君的原唱版本，基本上都是寶島味極濃的70年代老歌，當然不能說不好聽，但同「潮」字肯定聯絡不上關係吧！不過王菲的舊歌新唱卻成了神來之筆，全碟中基爾最喜歡的是你在我心中，只要再聽返鄧的原唱版本，就會知道陳偉文的編曲和王菲的唱功有多「神奇」了。

其餘的雪中蓮、但願人長久、翠湖寒、假如我是真的、奈何、又見炊煙、原鄉情濃等等全部分別是由陳偉文或辛偉力重新編曲，基爾比較喜歡雪中蓮和翠湖寒的飄逸韻味，以及但願人長久的淡淡幽情味。



《菲靡靡之音》之所以咁得基爾寵愛自然是有其原因，當中收錄的歌確實同依家的倒模式流行曲製作是兩個層次，不論從封套設計、編曲水平和王菲獨特潮爆的演繹神緒，作為一張翻唱大碟可說是巔峰之作，這樣完美的組合相信當今樂壇都好難再重現了。

不可思議的奇幻雪山

好喇暫時都係唔玩估歌星遊戲住！因為有位「世外高人」blog友竟然已經全部估中晒基爾心目中的5個型爆女歌手，真係好「可怕」呀！邊有人會咁勁架

喱種可怕程度同今日的異常天氣會唔會有關呢？！講說今日（28日）下午颳了一場超勁的大風雨之後，傍晚時份雨勢稍為停左，成個天都係一遍紫紅色的，對面海的飛鵝山仲披左一層「白雪」添喎！遠睇似唔似瑞士的阿爾卑斯山？又或者似三角朱古力的logo和雪山雪糕呢？

柴火甘味茶屋@北角

公司附近有個新樓盤，同事發現底層地舖開了幾間新食店，又搵左個周六去食個平tea。

幾年前仲有好多分店的麻布茶房撤出香港之後，喱間據聞是由前麻布茶房班底主理的麻布柴火甘味茶屋又悄悄捲土重來。



未睇menu，基爾已被台面這個宇治金時霜淇淋烤甘薯（$35）深深吸引，不過正餐都未食就食甜品又好似有點兒那個，還是留待下次吧！



下午茶有成10樣選擇，除左慣常有的飯、拉麵之外還有冷麵，最特別係仲有窩夫，不過甜品當飯食係咪太魔鬼呢？



最後天使贏左，都係正正經經叫個蕃茄湯燒雞肉拉麵（$38），碗麵其實都幾大，好夠飽；不過同事叫的芝麻醬鮮蝦冷麵（$44）就略細，食完唔夠喉結果要出去篤多串牛雜補數。p.s. 可能因為新開張竟然唔駛加一，幾抵！

 

柴火甘味茶屋 Takigi
北角渣華道98號地下2號舖

2Q12瀛遊東北@乙女像

「打開冰箱，查看裡面的東西。這幾天沒有買菜，裡面的東西不太多。取出熟透了的木瓜，拿廚刀一切兩半，用調羹挖著吃。然後取出三根黃瓜，用水洗淨，蘸著沙拉醬吃了。慢慢地花充足的時間咀嚼。把豆漿倒進玻璃杯裡，喝了一杯。這就是晚餐的全部內容……」

越肚餓時，是否食咩都會好好味？在溪流間來來回回行到差不多下午兩點鐘，個肚開始打鼓才醒起還未吃午飯，於是坐巴士返回十和田湖總站，因為那裏才有比較大的餐廳食肆。唔諗咁多基爾就叫了這個吉列豬扒蛋飯定食（￥1100），友人的咖喱豬扒飯看來也不俗。



食飽之後已差不多3點幾4點鐘，就直接去這晚下榻的十和田莊溫泉酒店。由於早上出發前已交帶之前的王子酒店將行李直接運送到十和田莊（兩酒店其實只相差10分鐘左右車程），所以下晝來到可以兩手fing fing咁輕鬆check-in，行李更自動送入了房，perfect！



十和田莊是傳統的和式客房，這晚就要睡榻榻米了。友人二話不說就從木櫃內拖出被鋪先來個午睡……不是累得咁交關吧！基爾就先沖下茶再翻看桌上的奧入瀨介紹單張，原來酒店都有local tour去奧入瀨，價錢也是￥1500，不算貴了。



見友人午睡咁無聊，晚飯又無咁早食，於是又走出去十和田湖邊行陣吧！看旅行書介紹，在湖邊有個稱為「乙女像」的雕塑，是十和田湖的地標。問過reception哥哥之後，原來由酒店出發，沿神社通方向走，經過消防署、郵便局、小市集及神社參道，大約走15分鐘便到。



乙女像就聳立在湖邊，由日本著名雕塑家高村光大郎以青銅鑄造，兩個赤裸少女的原形據說正是高村的太太；至於裸體雕塑的靈感是由十和田湖一帶優美自然景觀所啟發。不過由於這時湖邊正颳起十級冰冷強風，湖面也捲起了千層白浪，在雕像邊影一陣相已經頂唔順，還是急急腳打道回府為上以免冷親。



返到酒店已經差不多6點，又係時候開大餐了，一小碟一小碟精巧的理料放滿了一整張台，非常誇張，當然味道也相當不錯。在這間十和田莊一晚酒店連這個晚餐盛宴和翌日的自助早餐，才不過￥7350而已，算是很抵吧，還未計溫泉任浸呢！上左圖是之前行過郵局時買的青森縣紀念郵票，分別以弘前城、十和田湖、三社大祭和寒立馬等青森縣著名景區、節日祭典和名物作主題，弘前城稍後基爾也會去一遊。



由於掛住食也忘逐碟影相，在溫泉酒店的網頁找來這個「和式組合半自助晚餐」的照片補數，白飯和味噌湯任裝，菜式包括﹕鹽鮭魚、魚生、烤十和田A5和牛、大蒜醬蒸鮑魚、奧入瀨龍蝦刺身等。



食飽抖一陣之後，又係每晚的焦點節目「浸溫泉」，喱間十和田莊的溫泉確實又幾靚……無計！又要牲犧少少色相坦蕩蕩剝光豬咁去浸一陣，雖則話係分男女湯，但始終都唔係咁慣！



值得一提仲有酒店內的手信店，之前去旅行的經驗是﹕通常酒店的手信店都會斬人一頸血，多數齋睇唔買，不過喱間又幾好，看過價錢大部份同出面市集的手信店均一價，索性在這裏一次過入貨，唔駛花時間四圍去買。

美索不達米亞溯源@歷史博物館

睇完法貝熱，再按舊路線出埋去尖沙嘴歷史博物館睇美索不達米亞古文明展，上次來又係因為正在裝修展廳，搞到要專程去多次返兜。

美索不達米亞古文明的吸引力相比法貝熱珠寶有過之而無不及，偌大的展廳每個角落都逼滿人，所以幾乎都無法順序去睇，邊樣展品無乜人睇就要即時閃過去望望。不過即使以這種蜜蜂採蜜式的參觀方法，結果也花了兩個幾鐘兜了幾個圈才叫做睇晒。



講返個展覽，美索不達米亞Mesopotamia與之前睇過的凱撒大帝一樣，都係中一history課本裏的名字，睇到上面喱座人面翼牛守護神像可能會煥起返少少回憶，因為佢係最具代表性的亞述帝國時代雕像。



展品當中有幾幅巨型的壁畫浮雕，記述了亞述和巴比倫時代的幾場重大戰爭，和帝王貴族的生活面貌。這次的展品是來自大英博物館借出的珍藏，真係服左D英國人當年交通運輸咁唔方便，都可以將人地成幅牆咁大幾十米長的壁畫有本事千山萬山搬返屋企。



細個時有溫書的話，應記得美索不達米亞其實是指公元前3500-前539年之間、發祥於中東幼法拉底河River Euphrates和底格里斯河River Tigris的「兩河文明」，是世界四大文明古國之一。展覽中主要展示了蘇美爾Sumer、亞述Assyria和巴比倫Babylon等3個時代的文物。上圖左是蘇美爾時代的神像，據導賞員介紹，蘇美爾人愛用自己的樣子雕成神像奉拜；右上是巴比倫人鑄造用來量重的獅子砝碼；右下是著名的巴比倫門，它其實是尼布甲尼撒二世皇宮的城門。



早在公元前3200年，蘇美爾人已開始在兩河流域建立城市，並發展出完善的水利灌溉和農業系統，最重要是發明了人類最古老的「楔形文字」。上圖是亞述時代的青銅盛器，亞述帝國於公元前7世紀最強盛（相當於中國的周朝），當時在亞述、尼姆魯特、尼尼微等幾座古都已築起了宏偉華麗的皇宮，展覽中就用了幾幅「動態版浮雕壁畫」重現了皇室貴族的祭祀、奢華生活和狩獵盛況，比齋睇文物有趣。



講起巴比倫，最引人入勝的當然首推空中花園和巴別塔，兩者雖然早已堙沒在歷史塵土中，但由於不少古代希伯來文獻以至《聖經》都有詳細記述，不少畫家就按照這些文字記載替這兩座著名的古文明建築奇蹟重塑「復原圖」。先說上圖左的空中花園，相傳是公元前6世紀巴比倫國王尼布甲尼撒二世（Nebuchadnezzar）為其患思鄉病的愛妃修建，屬梯形高台式花園建築，設有完善灌溉系統；圖右的巴別塔就不用多介紹，讀過聖經的一定知道它的故事吧！



參觀期間剛好有導賞團，雖然係用國語介紹，不過都照跟去睇，有人講解始終比齋睇有趣味，導賞員的介紹也很生動有趣，唯一要挑剔係跟團的人實在太多，而選取講解的展品又太少，差不多只有十份之一，所以到頭來還是要自己重新再走一圈睇多次。

神串一日本料理@尖沙嘴

團購好多時都唔係想像中咁平，喱次去尖沙嘴The One的「神串一日本料理」就係一個好例子。

之前都聽同事講過，大部份網上團購的日本放題都有搵笨之嫌。不過喱間都算ok，食足2個鐘之餘，好多時都冇漏單，基本上叫乜有乜，而且最重要係都幾好食。上圖的雜錦魚生刺身和海膽手卷都是水準之上，前者仲encore左一次。



不過最終埋單計東加西加之後，同walk-in已經相差不遠。好彩點菜紙都有好多款式選擇，壽司、烏冬甚至粥和飯、雪花牛肉鍋都有，相信即使大食都絕對夠食。上圖的迷你魚生飯不錯，雖然飽肚D但都叫了一個。



野菜天婦羅炸蝦天婦羅都唔錯，燒牛柳粒一般，有點韌，不過牛利就激讚；清酒煮蜆也是不俗之選，雖然order一碟份量較少，不過都無所謂，愛吃也可以無限order。



話明係神串一當然仲要試埋串燒，果然款式比外面一般的日式放題店多好多，一於豬牛羊蝦樣樣都叫齊試晒佢。此外仲有好多唔得閒影：甜蝦、北寄貝、霜降牛肉他他等；最後仲要一讚的是燒物：燒羊鞍孜然味濃，仲有燒海蝦、鯖魚、豬頸肉和煙肉車厘茄，結果都要encore多次先肯收手。

 

神串一 Kushi One
尖沙嘴彌敦道100號The ONE 5樓